Од срце за Елена

Добри луѓе, хумани луѓе,  јас сум Ристе, татко на Елена и со сопругата Валерија со сите сили се бориме за животот на Елена. 
Елена има 24 години. Таа работеше како фармацевтски техничар и на 23 години замина во Словенија следејќи ги своите соништа за подобар живот. Но за еден миг се се смени. Од девојка полна со  елан која постојано беше во движење, која сакаше да биде опкружена со пријателите, да се дружи, да шета, се претвори во девојка која само лежи, не се движи, не зборува. Таа не може да јаде, не може да каже што сака да јаде, се храни преку гастростома. Целосно зависи од нас.

Нејзиниот живот, а со тоа и нашите животи се сменија. Постојано по болниците повеќе од една година, по патиштата, се со една цел да и помогнеме да го врати сјајот во очите и насмевката на лицето. Да може Елена да се дружи со пријателите, да може да каже што сака, како се чувствува.
Накратко ќе ви раскажам како животот може да се претвори во кошмар кој не може да се замисли и трае повеќе од една година.

Елена во Мај 2023  од Македонија се пресели во Словенија со надеж за подобар живот, нејзината радост траеше само два месеци. Во јули доживеа тежок мозочен удар со големо крварење и веднаш беше направена операција во Љубљана. Таа беше во кома 3 месеци и во ноември нејзиното лекување продолжи во Турција каде што имаше неколку оперативни зафати на главата, две трансплатации со матични клетки, започна со роботска рехабилитација.

На 15 јуни ја префрливме во Македонија во Аџибадем Систина каде имаше два оперативни зафати и нејзиното лекување продолжува овде. Таа во моментов не може да ги движи рацете и нозете, немаме комуникација со неа, се храни преку гастростома.

Потребни се огромни финансиски средства да го продолжиме лекувањето овде и да се бориме за нејзиниот живот.
Ги замолувам сите кои се во можност да донираат за Елена да го продолжи своето лекување и да ја вратиме нејзината насмевка.

Од ♥ за Елена